السلام عليكم ورحمة الله وبركاته
كيفكم حبيباتي واخواتي ماحلى لمتكم وجمعتكم الحلوة صحا كامل فطوركم وصحا سحوركم
انا كنت نتصفح فالنت ولقيت وجرت بزاف مرات طريقة صنع قلب اللوز بكل الخطوات بصح منجحش
لكن في احد المنتديات الجزائرية قيت طريقة مولاتها تحلف وتعاود بلي جاها هايل ولقيت بزاف اللي دارو تطبيقاتهم ونجحلهم 100/100
وانا وحدة منهم لذا قررت مانبخلش على خواتاتي وحتى لي جون اللي راهم حابين يبيعو قلب اللوز نعطيكم الطريقة والله ولا فالاحلام
اليكم المقادير : 3 كيلات سميد خشن (انا مولفة ندير عبر كاس الماء)
2 كيلات سكر
1 كيلة ماء زهر (احسن نوعية لي كاين مارك واسمو نونورس او الزاينة ارجوكم ركزو على نوعية ماء الزهر هي الاساس)
قرصة بين الاصابع ملح (هاذي اضافة من عندي باه ماتجيش سامطة )
الشربات :2.1/2كيلات ماء 1/2 كيلة ماء الزهر 1 كيلة سكر
العجينة :نخلط كل مقادير العجينة مع بعض بدون عجن خلطي بصباعك برك قد ما تشمخي كامل السميد في هادي اللحظة حضري صينية ماتكونش كبيرة وماتكونش صغيرة بزاف متوسطة بايدك ادهنيها بالزبدة مالازمش تكون ذائبة ثم فرغي المحتوى اللي خلطتيه في الصينية وحاولي تسوي الصينية بلا ماتضغطي بيدك على العجينة هي بروحها تمشي لانها رح تكون جارية شوية غطيها بمنديل وتركيها على راحتها باه السميد يتشرب الماء والمازهر
اما تخلطي الخليط فالليل وتطيبيه فالصباح واما تخلطيه الصباح وتطيبيه فالليل من الاحسن تديريه فالليل وتطيبيه الصباح علابالي مش رح تصبرو عليه باه تذوقوه وماتنسايش بلي راكي كي تديريلو اشاربات الصباح رح تخليه تاني يرتاح باه يشرب اشربات
فالصباح كي تنوضي اشعلي الفور انتاعك حتى يسخن وفداك الوقت قطعي قلب اللوز على شكل مربعات وزينيه باللوز ولا كوكاو
اذيبي 2 ملاعق اكل زبدة وسقيه بيها باه تعطيلو اللون الاحمر
دخلي قلب اللوز الفور وطفي الفوقاني لما يحمار من الجوانب طفي التحتاني اشعلي عليه من الفوق باه يتحمر مليح لازم يكون لون انتاعو كامل بني اخرجيه من الفور مباشرة سقيه بالشاربات اللي تكون باردة كيفاش تكون باردة وهو حامي اتركيه يتشرب الشربات شي ساعة ونص اواكثر كيما حبيتي
فيما يخص الشربات : ضعي المقادير على النار ومن لما يبدى يغلي احسبي 5 دقائق ركزي قلت 5 دقائق وطفي عليه اتركيه يبر د ومن بعد سقي بيه لما طلعي الصينية من الفرن
وهادي بعد ماطاب وتشرب اشربات
تبعو خطواتي واللي تنجحلها تدعيلي والله انا جربتها والله حاتا اداوسنا عليه والسنيوة كملت في نهارها
عذرا على الشرح المفصل بصح هادا هو طبعي لازم نفهم مليح ونبسط المعلومة ههههههههه
شهية طيبة وردولي الخبر
منقول كيما لقيتو
الرئيسية 
عدد المساهمات
السمعة
